RG-p akerleriissutaanera upernaaq aallartippoq

Inatsisartut siulersuisoqarfiata ullo’qeqqanut ataatsimiilerami isummerfiginiarsaraa Inatsisartut maanna ataatsimiinneranni Royal Greenlandip pisortaasa naalakkersuisullu akerleriissutigisimasaat immikkut oqaluuserineqassanersoq.

Royal Greenlandip naalakkersuinikkut akerleriissutigineqarnera ukioq februaarip ulluisa 19-anni suliffeqarfissuup immikkut ittumik ataatsimineersuarneranik aallaaveqartutut ippoq.

RG-p siulersuisuisa inuussutissarsiutinik ingerlatsivinneersut inuussutissarsiutitigut nunarsuarmiut periaasiinik ilisimaarinnittut taama misilittagaqanngitsunik taarserneqarnerat taamanili sukumiisumik akineqanngilaq.

Sapaatip akunneri sisamangajaat qaangiupput taamani RG-p siulittaasuata Elias G. Larsenip allarut miloriummagu anneruniuttullu imaaginnalerlutik.

Ilallugulu Royal Greenlandip pisortaasa Alfred Berg Bankimik isumaqatigiissutigisimasaat naalakkersuisoqarfimmit oqaatigineqarpoq pisinnaatitaanermik qaangiinerusimasoq.

Pisut inernerigallagaat tassa RG-nngooq eqqissilluni sulinissaa siunertaralugu naalakkersuisut siulitttaasuata Hans Enoksenip naalakkersuisoqanni Jørgen Wæver Johansen inissimmagu RG-mut akisussaaneranik arsaarlugu akisussaaffillu nammineq tigullugu.

Taamaannerani Royalip siulittaasortaava Paaviaaraq Heilmann issiavittaaminut ingereerpoq politikerillu aalajangernissaat utaqqiinnarlerlugu pissangallutillu naalarulupput naalakkersuisunut illatungiliuttut RG-p qaqileriffiginissaanik piumasaat inatsisartut siulittaasoqarfiannit inatsisartuni oqaluuserisassanngortinneqassanersoq tusarusullugu.

Illuatungiliuttut paaaserusutaannut ilaavoq Royal Greenlandip namminersortunngorsarneqarnissaanut periarfissanik naalakkersuisut ataavartumik ilisimatinneqartarsimanersut selskabinillu aqutseriaaseq iluameersoq takutinneqartarsimanersoq.