Naatsorsueqqissaartarfik pisortartaarpoq
Naatsorsueqqissaartarfik nutaamik oktobarip aallaqqaataaniit pisortartaarpoq.
Pisortartaaq Lars Pedersenimik atilik 1959-mi inunngorpoq, Københavnillu ilisimatusarfiani cand. polit-itut ilinniarsimalluni. Danmarkimi Norgemilu naatsorsueqqissaartarfinni sulisimavoq, 1998-miillu Danmarkimi naatsorsueqqissaartarfimmi sulisimalluni. Nunatta naatsorsueqqissaartarfiani aamma sulisuunikuuvoq, 1993-miit 1995-p tungaanut tassani atorfeqarsimalluni.
Lars Pedersenip nunatsinni kisitsisinit paasissutissat ingerlaannaavinnissaat pisariaqarsoraa, naatsorsoqqissaakkanillu atorfissaqartitsisut piffissaq eqqorlugu tunineqartarnissaat aamma pingaartippaa.
Soorlu kommunit ukiut tulliinut aningaasatigut naatsorsuusiornissaminni atorfissaqartitaat, innuttaasut pillugit kisitsisit tunniutereerneqarsinnaasut.
Kistsisit pillugit paasissutissiineq pingaarnerpaatut isigigamiuk suli ingerlaannassanerarpaa, ingammik nittartakkatigut. Naatsorsoqqissaakkallu pillugit atuagaq ukiut tamaasa saqqummersartoq ingerlaannassasoq pisortartaaq Lars Pedersen oqarpoq.