Uumasut nungutaanissamik navianartorsiortinneqartut pillugit Bangkok-imi nunat tamalaat aallartitaasa ataatsimiinneranni tikaagulliit neqaanik nioqquteqarnissamut dansket isummaminnik allanngortitsipput. Japanip siunnersuutaanut naaggaarnissaraluartik danskit allanngortippaat, tassa taasinermi akerliuniaratik aammali tapersersuiniaratik nalunaarutigaat.
Taamaalilluni Danmark Kalaallit Nunaata Savalimmiullu arferit pillugit isumaannut tapersiisutut oqaatigineqarsinnaapput. Tikaagulliup neqaannik nioqquteqarnissamik japanimiut siunnersuutaat tallimanngorpat taasissutigineqassagunarpoq. Danskit aallartitaasa taaseqataaniaratik aalajangeriataarnerat pissuteqarpoq Atlantikup Avannaani Suleqatigiit Folketingimi amerlanerussuteqartut naaggaaqqusillutik inassuteqarnerannut naammagittaalliornerujussuat.
Japanip tikaagulliup neqaannik nioqquteqarnerup ammaanneqarnissaanik CITES-imut siunnersuutaa amerlanerussuteqartunit itigartinneqassaaq, Danmarkili taaseqataasunut ilaassanngitsoq Ritzau allappoq.