IA: Royal Greenland inatsisartuni sammineqartariaqarpoq

Royal Greenland-ip nunani allani ingerlataasa namminersortunngorsaanissaanut tunngasut inatsisartuni oqaluuserineqartariaqartut, inatsisartuni ilaasortaq Aqqaluk Lynge, Inuit ataqatigiineersoq isumaqarpoq.

Aamma pisariaqarsoraa pissutsit qulaajarneqartariaqartut, nunatsinni suliffissuit aamma eqqarsaatigalugit, piginnittullu Naalakkersuisut royal greenland pillugu piumasaat suliffeqarfissuup siulersuisuinit qullersaaniillu malinneqartariaqartut.

Royal Greenland-imi pissutsit inatsisartuni oqaluuserineqartariaqarnerannik isummersornermini Aqqaluk Lynge tunngavilersuivoq naamagilersorigamiuk, pisut oqaluuserineqaranni kimmaateqattaaneq, imminullu pisuuteqattaaneq politikerit suliffeqarfissuullu qullersaasa akornanni ingerlanneqarsimasoq.

-Taammaammat inatsisartuni ilaasortat piginnittutut nassuiaaneqartariaqarput. Royal Greenland nunatsini pingaaruteqartorujussuartut inissisimavoq, nunatsinni suliffissuit annersaralugu, nunarsuarmilu aalisakkeriffiit annerpaartaanut ilaalluni, Aqqaluk Lynge oqarpoq.

-Aamma inuiaqatigiit soqutigisarissavaat suliffeqarfissuaq qanoq ingerlariaqqinniarnersoq paasissallugu. Namminersortunngorsaanissarlu qanoq ingerlanniarneqarnersoq paasissallugu pisariaqarpoq, Aqqaluk Lynge oqarpoq.

Naalakkersuisut siulittaasuata qanoq iliuuseqarnianngikkallarnera pillugu Aqqaluk Lynge oqarpoq, paasissutissat saqqummiunneqartussat tunngavigalugit inatsisartuni oqallittoqartariaqartoq, nammineq inatsisartuni ilaasortatut kissaatigissagini.