Paamiuni iluliarujussuaq ikkarlisimasoq
Paamiuni umiarsualivik maanna sapaatip akunninngulersumi iluliangaatsiarsuarmik assersimaneqarpoq, taamalu qaartiterisartumit iluliaq qaartillugu misilinniarneqarluni.
Skrevet af Louise M. Kleemann
06. marts 2008 06:31
Iluliaq 18 meterisut itissusilimmi ikkarlisimavoq, umiarsuaq ”Irena Arctica” Paamiunut ullumi tikittussaanerarneqarpoq ilaasoralugit qaartiterisartoq qaartiterutissanik 500 kiilunik nassartoq. Qaartiterisartup iluliaq qaartissinnaanerlugu aqagu misilinniarpaa, taamaalilluni umiarsualivimmut pulariaa aqqutigineqarsinnaanngorniassammat.
”Irena Arctica”p nassataasa ilagissavaat containerit qerititsiviusut 20-t, Paamiuni Royal Greenlandip suliffissuanut ingerlatinneqartussat. Taakkua niuneqarnissaat pingaaruteqartorujussuuvoq, taamaalillunimi suliffissuup tunisassiornera ingerlaannarsinnaaniassammat.
Ineqarnermut Attaveqarnermullu Pisortaqarfiup isumaqatigiissuteqarfigineratigut iluliaq qaartinniarneqarpoq.
