Enoksen Australiap ministeriuneranut allagaqarpoq
- Inuiaat kalaallit Kalaallit Nunaannilu Naalakkersuisut sinnerlugit Australiami nunap inoqqaavinut nassuerutiginnillutit utoqqatsernerit pillugu ilumoorlunga tapersiinera matumuuna ersersippara, Hans Enoksen allappoq.
- Kalaallit Nunaanni iluarisimaarparput nunarsuarmi inuiaat amerliartuinnartut takusinnaalermassuk, oqaluttuarisaanermi pisimasunik ammasumik, unneqqarissumik, eqqortumillu ilisimaarinninneq tassaasoq eqqisseqatigiilluni, ataqqeqatigiilluni, aamma imminut naligiilluni, inuit akornanni inooqatigiinnermut aqqutissat ilagigaat, apeqqutaatinnagu ammip qalipaataa tunngavigalugu qanoq naggueqarneq, Hans Enoksen allappoq, nangipporlu:
- Iliuuserisat Kalaallit Nunaanni soqutigineqaqaaq pingaartumillu angisuumik ataqqineqarpoq, tassami nunap inoqqaavisa nunarsuarmi sumiikkaluarunilluunniit ajornartorsiutaat annerusumik
minnerusumilluunniit imminnut assigiissuteqarmata.
Australiami nunap inoqqaavi aboriginerit pillugit ilungersuuteqarninnut ataqqinningaarnera tapersersuineralu taamaalillunga ingerlateqqippara, Hans Enoksenip Kevin Rudd-imut allakkani taama naggaserpai.