Siumup ataatsimeersuarnera Ilulissani Kulturikkut Illorsuarmi Sermermiuni ullaatungaa nalunaaqutaq qulingiluanut aallartippat erinarsoqatigiittoqassaaq, erinarsoqatigiittoqareerpallu Ilulissat borgmesteriat, Siumup Ilulissani siulittaasua Siumullu partiiata siulittaasua, qinigaaqqeqqammersoq, Hans Enoksen, tikilluaqqusissapput.
Siulittaasoq ualeru nalunaaqutaq marlup qeqqa nalunaaruteqassaaq. Unnugulu nalunaaqutaq arfineq-marluk qaangerlugit tanneq pingasuniit nalunaaqutaq qulit tungaanut arsaalluni timersortarfissuarmi unammersuarneqassaaq, tassani siumukkormiut kommunikkaartumik unamminerit ingerlanneqassallutik.