Kalaallit Nunaanni politiit eqqorneqartussanngorput
Kalaallit Nunaanni politiit naalagaaffiup sipaarniarnissaani eqqorneqartussanngorput. Kalaallit savalimmiullu politiivisa ukiumut kingullermut naleqqiullugu ukioq manna 3,5 millioni koruunit sipaartussanngorpaat. Tamanna aningaasanut inatsisissatut siunnersuummi 2008-mi atuuttussami takuneqarsinnaavoq.
Kalaallit Nunaanni Savalimmiunilu politiit 187,6 millioni koruuninik aningaasartuuteqartussatut missingersuusiorneqarsimapput. Taakkunanngallu tassa 3,5 millioni koruunit sipaarutaasussanngortut Inatsisissatut siunnersuummi Aningaasaqarneq pillugu ministerip Lars Løkke Rasmussenip ullumi saqqummiussaani takuneqarsinnaavoq.
Aningaasanut 2008-mi inatsisissami naalagaaffiup ingerlatsinerani aningaasartuutit 1 procentimik sipaarutigineqartussatut siunnersuutigineqarput. Sipaarutigineqartussat 2009-mi sillimmataasussatut siunnersuutigineqarpoq.