Kalaallit qimuttuitsunut akikillisaavigerusunngilaat
Taama erseqqissaateqarpoq angallannermut ministeri Konservativiusoq Carina Christensen, Folketingimut ilaasortamut Socialdemokratineersumut Rasmus Prehnimut akissuteqarnermini.
Siorna apriilimi Folketingip DSB-p akikillisaanermut aaqqissuussinera annerulersillugu ilinniartut tamaasa naalagaaffimmit tapiiffigineqartussanngorlugit aaqqissuussisoqarpoq.
Tamanna sioqqullugu ilinniartut 26-t ataallugit ukiullit kisimik akikillisaavigineqartaraluarput. Akikillisaavigineqarnissamut Danmarkip naalagaaffianit ilinniarnermut atatillugu tapiissutisisarneq piumasaqaataavoq. Taamaalilluni kalaallit ilinniagaqartut tapiiffigineqarsinnaanngillat, taakkumi nunatsinniit ilinniartuunersiuteqaramik.
- Aaqqissuussinerup annerulersinneqarneranut atatillugu danskit naalagaaffiannit ilinniartutut tapiiffigineqartarneq piumasaqaataavoq kalaallillu nunaminnit ilinniartuunersiuteqartut tapiiffigineqarnissamut periarfissaqanngillat, angallannermut ministeri akissummini ilaatigut allappoq.
Danmarkimi naalakkersuisut, Danmarkimi ilinniagaqartunik immikkoortitsinerat Dansk Folkepartiimit paasiuminaatsinneqarpoq.
- Danmarkimi naalakkersuisut kalaallit Danmarkimi ilinniagaqartut danskinut ilinniagaqartunut naligiissikkumanngimmatigik kamanaaqaaq naleqqunnanilu. Tamatta danskit naalagaaffianni innuttaaqataavugut tamannalu naalakkersuisut aallaavigisariaqaraluarpaat, Dansk Folkepartiip ilinniartitaanermut oqaaseqartartua Martin Henriksen oqarpoq.
