Aatsitsiviliornissaq pillugu oqallinnissaq ujartorpaa
Kjartan Olafsson Islandimi alumiiniumik aatsitsiviliornermi misilittakkat aallaavigalugit ilaatigut taamatut oqarpoq.
Alumiiniumik aatsitsiviliornissaq pillugu Kalaallit Nunaanni oqallinneq sivikitsuinnarmik ingerlanneqarpoq, tamannalu pillugu isummersornerit nutaajullutik. Alumiiniumik aatsitisiviliornissaq inuiaqatigiinni eqqarsaatigilluaqqissaarneqartariaqarpoq.
Aalisanermik inuussutissarsiuteqarneq aningaasarsiormi pinngitsoorneqarsinnaanani pingaaruteqartorussuuvoq, allannguisoqarnissamilu kalaalit namminneq periusertik atorlugu iliuuseqassapput Kjartan Olafsson oqarpoq.
Inuiaqatigiinni pissutsit allannguuteqarsinnaapput, allannguutit naammaginanngitsut pisinnaallutik. Nunaqarfik 500-nik innutaqartoq ukiut ikittunnguit ingerlaneranni 1000-inik imaluunniit 1500-inik amerlatigisunik inutussuseqalersinaavoq, tamannalu inuiaqatigiinni annertuumik allannguutaasinnaavoq.
Kalaallit nammineq iluarisartik atorlugu iliuuseqartariaqarput, Kjartan Olofsson oqarpoq.
Islandip kangisissuani Reydarfjordurimi Alcoap ukioq 2004-mi alumiiniumik aatsitsiviliornerata erngullu nukissiuutiliornerata inuiaqatigiinnut kinguneri Kjartan Olafsson mississugarivai. Islandip kangisissuani aniningaasarsiornerup siuarsarneqarnissaa siunertaralugu aatsitsivimmik sanasoqarpoq, tamannalu iluatsippoq, Kjartan Olafsson radiaoviisimut oqaluttuarpoq.
Islandip kangisissuani nunaqarfimmiut bussinik assartorlugit Alcoamit sulisorineqarput tamannali Kalaallit Nunaanni pissutsinut assersuunneqarsinnaanngillat Kalaallit Nunaannimi nunaqarfiit akornanni aqqusineqanngimmat, Islandimi Akureryrip universititiani lektori
Kjartan Olafsson suleqatitsinnut Per Jensenimut oqaluttuarpoq.
