CIA-p timmisartuutai nunatsinni nunnittarsimapput
CIA-p tigusanik inatsisit unioqqullugit angallassisarsimanerani Danmarki pingaruteqarsimagunaqaaq.
DR1-imi piviusulersaarummi unnugu takutinneqassaaq inuinnaat timmisartuutaat tigusanik angallassisarnerni atorneqartarsimasutut pasineqartut Kalaallit Nunaat akunniffigisarsimagaat.
Tigusat nunani assigiinngitsorpassuarni innuttat eqqartuunneqaqqaaratik CIA-mit aallarunneqartarsimapput nunanilu assigiinngitsuni, soorlu Usbekistanimi Afghanistanimilu paarnaarussivinnut isertuunneqartunukaateriarlugit ilaatigut uppernarsarneqarsinnaasumik naalliutsinneqartarsimapput, naak tigusat pasineqaannartarsimagaluartut. Europarådip europaparlamentillu inuinnaat timmisartuutaat 35-t CIA-mit tigusanik angallassisarnerni atorneqartarsimasutut pasivaat.
Danmarks Radiomi pisimasulersaarummi qulaajarneqartut naapertorlugit timmisartut taakku pingasorarterutaat Narsarsuarmi akunnittarsimapput – sulilu amerlanerit danskit killeqarfiata iluani ingerlasarsimallutik. Europarådip naqissuserpaa tigusanik angallassisarsimaneq CIA-p ajortumeerinianut aaqqissuussamik sorsunneranut ilaasimasoq pingaarutilik.
Paasiniaasartut ilaata, Garwin Simpsonip oqaatigaa CIA-p akunnittarsimaneri tigusanik angallassisarsimanernut pingaaruteqarluinnartuusimasut.
- Nunap assingani Kalaallit Nunaata aappalaartumik ammalortuliorfigineqarsimanera uisaallannarpoq, pilersaarusiap aaqqissuussap ilaatut isikkoqarami, Simpson oqarpoq.
Danmarks Radiomi pisimasulersaarummi aamma qulaajarneqartut naapertorlugit timmisartortartut ilaat Kalaallit Nunaannut missimasoq, allamik ateqartuusaarsimavoq, tassami taassuma CIA-milu kilitsissiat ilaata ujaarineqartup, allakkerisarfimmi postboxiat assigiimmik normoqarmata.
CIA-p ajortumeerinianut sorsunnermini ukiuni arlalissuarni tigusatik, pasisaaginnartut, nunanut assigiinngitsunut aallaruteriarlugit naalliutsittarsimagaat qularnarunnaarpoq.
Danmarks Radiomi piviusulersaarummi unnugu aallakaatinneqartussami, aamma KNR-ikkut aallakaatinneqartussami, qulaajarneqartut takutippaat CIA-p inatsisinik unioqqutitsilluni tigusanik aallarussisarsimanerini Kalaallit Nunaat pingaaruteqarluinnarsimasoq.
Danmarks Radiomi piviusulersaarummi aallakaatitassiortut paasiniaanerminni angut, allamik ateqartuusaarluni Kalaallit Nunaannut timmisartumik mittarsimasoq ujaaralugu USA-mi postboxia, nassaarisimavaat, postboxilu taannarpiaq aamma CIA-mi kilitsissiat arlallit ujaarineqartut atugarisimavaat. Tassannga postboximik atuisut kilitsissiat arlallit Tysklandimi innuttaasumik inatsisinik unioqqutitsilluni aallarussisimasutut pasisaallutik Tysklandimi naalagaaffiup unnerluussisuanit ujarneqarput. Europarådip europaparlamentillu inuinnaat timmisartuutaat 35-t CIA-mit tigusanik angallassisarnerni atorneqartarsimasutut pasivaat.
Danmarks Radiomi piviusulersaarummi qulaajarneqartut naapertorlugit timmisartut taakku pingasorarterutaat Narsarsuarmi akunnittarsimapput – sulilu amerlanerit danskit killeqarfiata iluatigut ingerlasarsimallutik.
USA-p præsidentiata, George Buship oqaatigaa tigusanut aaqqissuusamik iliuuserineqartartut ajortumeerinianut sorsunnermi pingaaruteqarluinnarsimasut pingaaruteqarluinnartuassasullu.
Danmarkimi naalakkersuisut manna tikillugu CIA-p inatsinik unioqqutitsilluni danskit killeqarfiata iluani iliuuserisartagaat ilisimasarfiginagit oqartarput.
Aallakaatitassiaq "DR1 Dokumentari – CIA-p attaveqarfii qallunaat" unnugu arfineq-marlunut qiteqquppat KNR-ikkut aallakaatinneqarumaarpoq.