Qunusaarisimasutut isornartorsiorneqarput
Folketingimut ilaasortat katillugit aqqaneq-marluusut aviisimut Jyllands-Postenimut ilanngussaminni allapput, inuusuttutut, Folketingimullu ilaasortatut nutaatut tamat oqartussaaqataanerat naapertorlugu tatigisatut sulineq ataqqilluinnaritsik, isumaqarlutillu taamatut ataqqinninneq partiit naalakkersuisuutitaqartut Dansk Folkepartiillu amigaatigigaat.
- Folketingimi sulineq innuttaasunit ataqqineqartariaqarpoq. Taamaattorli kalaallit Folketingimut ilaasortaqatitta pineqarnerisa kinguneranik taamatut ataqqinninnerup siunissami attatiinnarneqarnissaata ajornakusuulernissaa annilaanngatigaarput, taama allapput Folketingimut ilaasortat inuusuttut Socialdemokratineersut, SF-imeersut Enhedslistemeersullu.
- Kalaallit inuiaassutsimittut tunuliaqutaat nikanarsarlugit oqaluttoqaqattaarpoq, naalakkersuinikkullu apeqqutit pineqartumut attuumassuteqanngitsut piffissaajaatigineqarlutik, inuusuttut aqqaneq-marluusut ilaatigut taama allapput.
