Ataatsimiititaliarsuaq Lars-Emil Johansenimit nersorneqarpoq
Folketingimi ilaasortaq Lars-Emil Johansen attortisimaarpoq:
- Ukiut 14-it matuma siornatigut naalakkersuisut siulittaasuutilluni Danmarkimi inatsiseqarnermut ministerilu isumaqatigiippugut, eqqartuussiveqarneq pillugu ataatsimiititaliarsuaq pilersinneqassasoq. Maanna inerneri inatsisinngortilerpagut. Folketingi tamarmiulluni tapersersuivoq, Lars-Emil Johansen nassuiaavoq.
Herstedvesterimut inissiisarnerit, sulisussanik ilinniartitsinerit, pineqaatissiisarnerit ilaasa allanngortinnissaat, nunatsinni parnaarussiviliornerit matoqqasumillu isertitsiviliornissat aqqutissiuunnissaat pingaartorujussuusut aamma oqaatigaa.
- 1953-imiunnguatsiarpoq angalasoqarpoq eqqartuussiveqarnermi aaqqissuussisussanik “juridisk ekspedition”-imik taasamik.
- Kalaallit eqqarsartaasiannut qanittumik eqqartuussiveqarneq aaqqissuunneqarpoq. Pinerluttaalisitsinermullu inatsit taamanernit pilersinneqarluni. Taanna nersorpara, kisianni naammagunnaarsimavoq, Siumut sinnerlugu folketingimi ilaasortaq oqarpoq.
Kalaallit inuiaqatigiit europap kitaani inooriaatsimut qanittumik inooriaaseqalersimapput pinerluttartut aamma eqqarsaatigalugit.
- Maannalu nutarterineq pivoq. Kalaallit anersaava qimanngikkaluarlugu, Lars-Emil Johansen erseqqissaavoq.
Eqqartuussiveqarneq pillugu inatsit aalajangersakkanik (paragraf) 749-nik imaqarpoq, pinerluttulerinermut inatsit 266-inik aalajangersagaqartoq.