- Tusagassiuutit aqqutigalugit aaqqiisoqartussaanngilaq, Per Berthelsen oqarpoq.
- IA-p Siumullu akornanni suleqatigiinnissamik isumaqatigiissuteqarsimappat, ileqqorinnerusumik pisoqarsinnaannginnera tupigusuutigeqaara, Per Berthelsen oqarpoq.
Taanna isumaqarpoq Nuup kommuneani kommunalbestyrelsemi ilaasortat massakkut aliikkutassiatullusooq tusagassiorfinni ingerlanneqartut.
- Tamanna avaanngunarpoq toqqissisimanarnanilu, Per Berthelsen oqarpoq.
Taanna aperaarput apriilimi kommunemut qinersisoqalerpat tamanna innarliiumaarnissaa naatsorsuutigineraa.
- Apeqquterujussuuvoq Siumut massakkut qanoq iliorniarnersoq Siumukkut Atassutikkullu marluullutik amerlanerussuteqarsinnaanngillat maani Nuummi, akivoq.
Taassuma naatsorsuutiginerarpaa tamanna Siumukkut eqqarsaatigisimassagaat. Qanorlu ilillutik amerlanerussuteqarnissartik qulakkeerniarlugu iliuusissaminnik eqqarsaateqarsimassasut.
- Maannamut suli oqaloqatiginninnissamik tusagaqarnikuunngilagut, oqarpoq.
Per Berthelsen erseqqissaavoq akerleriit taakku marluk suleqatigeeqqilissappata tupinnassaqisoq.
- Aaqqiagiinngissutit aliikkutassiatut ilillugit saqqummiussoreerlugit kingornatigut naapeqatigiittoqassappat taava tatiginassuseq sumiinnersoq apeqquserujussuassavara, Per Berthelsen naggasiivoq.