Kommunerujussuit qilanaaraat
GA isumaqarpoq, inuussutissarsiornikkut ineriartorfiulluartut sisamat pisariaqartinneqartut, innuttaasut illoqarfinnit minnernit nunaqarfinniillu nutsernerannik kinguneqassagaluarpalluunniit.
Namminersornerulernissamik aningaasarsiornikkullu nammineernerulernissamik siunniussaqarneq anguneqassappat, pisariaqalissannginnerluni eqqarsaatigissallugu ineriartorfiulluartunik sisamaasunik taaneqartartut maannakkornit anginerusunngortinneqarnissaat nukittuninngortinneqarnissaallu, sulisitsisut kattuffianni GA-mi pisortaq Henrik Leth radioaviisimut oqarpoq.
Illoqarfiit anginerit sisamat anginerusunngortinniarneqarpata immaqalu illoqarfinnit minnernit nutserfigineqarlutik, apeqqutigineqarmat soorlu inissanik sanaartorneq malinnaaffigineqarsinnaajunnaarluni taava, Henrik Leth akivoq:
- Soorunami pilersaarusiornermi tamanna piareersimaffigineqartariaqarpoq. Kisiannili isumaqarpunga ajornannginnerusumik eqqarsarluarnerusumillu nunap immikkoortuini ineriartortitsisoqarsinnaasoq, qitiusumik aqutsinerminngarnit aamma ullumitut illoqarfiit akunnerminni pinnaateqinatik, suleqatigiillutilli.
Avannaa qiviaraanni Ilulissat ineriartupiloorfiuvoq illoqarfimmi qaninnerpaartaani Qasigiannguani unittooqqasuusisoqarluni, tassanngalu Ilulissanut suliartortoqartarluni.
- Eqqumiigineqarsinnaanngilaq periarfissalissuarnut inuit nuuttarmata, illoqarfinnimi tamani suliffissualiortoqarsinnaanngilaq. Nunarsuarmioqatigiikkaluttuinnarnermi tamanna naluneqanngilaq, Henrik Leth oqarpoq.
Nangillunilu illoqarfinnit minnernit nunaqarfinnillu illoqarfinnut anginernut nutsertarnerit takornartaanngitsut, Sulisitsisut Peqatigiiffianni GA-mi pisortaq Henrik Leth oqarpoq.