Aatsaat taama avannarpartertoqartigaaq
Umiarsuaq aatsaat taama avannarpasitsigisumi angalaarpoq, tassa umiarsuaaraq Tara Qalasersuarmit 160 kilometeriinnarnik kujasinnerusumut pisimagaluarami.
Skrevet af Mads Lynge
18. december 2007 11:23
Angalanerli nalinginnaasuunngilaq. Tara sikkussaalluni Ruslandip imartaanit kimmut sarfaatitereerpoq, maannalu Svalbardip Nunattalu sineriaata akornanniilerluni.
Ilisimatuup Norgemeersup Fridtjof Nansenip ilimagisaa uppernarsarniarlugu sikumit sarfaatitittoqarpoq.
Nansenip eqqoriarpaa siku Qalasersuaq kaajallallugu sarfaatitittartoq, umiarsuarlu Fram atorlugu nammineq tamanna 1893-imi uppernarsarniarsimagaluarpaa.
Nansenillu eqqoriagaa maanna uppernarsarneqarsimasutut nalilerneqarsinnaassagunarpoq, ilami umiarsuaaraq Tara kilometerinik tuusintilikkaanik sarfaatitereerluni Fram Strædemut Svalbardip Nunattalu akornanniittumut maanna anngutereermat.
