Tyrkiamiut timmisartui qaartartunik nakkaatitsisut
Tyrkiamiut kurderinut pikitsitsinianut aatsaat taama sakkortutigisumik saassussipput. Tyrkiap illoqarfiisa pingaarnersaanni Ankarami sakkutuut qullersaasa oqaatigaat timmisartut sorsuutit pikitsitsiniat Kurdistans Arbejderpartip, PKK-p, sakkutooqarfii qaartartunik nakkaatitsiffigisimagaat, tassami taakkunaniit Tyrkiamiut isumannaatsuunissaq pillugu sakkutuui saassutarineqartaannarmata.
- Tyrkiamiut timmisartui arfineq-pingasut illoqarfinnik nunaannarmiittunik arlalinnik qaartartunik ullaaq naakkaatitsipput, Jabbar Yawar Irakimi Kurderit sakkutuuisa oqaaseqartitaat, Irakip avannaani isumannaatsuunissamut akisussaasuusoq oqarpoq.
- Illoqarfinni qaartartunik nakkaatitsiffigineqartuni ilaqutariit qimarrapput. Killeqarfinni nakkutilliisuvut ikiligaasimasut qassiunerinik misissueqqullugit qinnuigereerpavut aamma aserukkat qanoq annertutiginerannik nalunaaruteqaqqusivugut, Jabbar Yawar oqarpoq.