Illussamik titartaarusuppoq
Sermitsiap paasivaa, illussanik titartaasartup silarsuarmi tusaamasap qalipakkanik saqqummersitsisarfissaq Nuummiittussaq titartarumallugu siulersuisut saaffigisimagai.
Pisortatigoortumik aalajangertoqanngikkallartillugu siulersuisut siulittaasuata Kaj Kleistip illussanik titartaasartup atia saqqummiukkumanngikkallarpaa.
Illussanilli titartaasartup taassuma piumasarisimavaa, nammineq titartaasinneqassaguni illussanik titartaasartut allat arfineq pingasut matoqqasumik unammisinneqassanngitsut.
– Illussanik titartaasartoq taanna unamminermut peqataajumanngilaq. Taama nikanartiginnginnami, Kaj Kleist Sermitsiamut oqarpoq.
Nunani avannarlermiunik unammisitsineq neqerooruteqarnerup siulersuisut aalajangeruminaatsilersippai.
Kaj Kleistip oqaatigaa Nordisk Kultur Fond qalipakkanik saqqummersitsisarfissamut milliuunit affaannik tapiiumalluni akuersisimasoq. Aningaasalli taakku matoqqasumik unammisitsinissamut, illussanik
titartaasartut arfineq pingasut saqqummersitsisarfissap illutassaata isikkussaanik titartaallutik unamminissaannut atugassaapput.
Grønlands Nationalgalleri illussanik titartaasartumit silarsuarmi tusaamasaasumit
titartarneqassappat Kalaallit Nunaat silarsuarmi ilisimaneqarlualissaaq.
Siulersuisuni ilaasortaq, eqqumiitsuliortoq Bodil Kaalund taama isumaqarpoq.
– Tamanna Kalaallit Nunaata silarsuarmi tusaamaneqarneranut iluaqutaasorujussuussaaq, Bodil Kaalund oqarpoq.