KNR tuniniaasartumit saaffigineqarpoq
KNR tuniniaasartumit qaammat kingulleq saaffigineqarpoq, peqatigiiffiup Kalaallit Meerartaat-a aningaasanik juullimut tunissutissarsiutissanik nerisassarsiutissanillu katersuiniarneranut atatillugu tapersersuisinnaanersoq aperisumit.
Allaffissornermi atortunik tuniniaasartut Buy-Aid peqatigiiffimmik ilisimatitseqqaarsimanngitsoq, Foreningen Grønlandske Børnip allattaanera Tina Frausing oqarpoq.
- Buy-Aid allaffissornermi atortunik tuniniaasartuuvoq, ilaatigut aamma Kalaallit Nunaanni tuniniaasarlutik. Buy-Aid-imik suleqateqarnerput maannamut imaappoq: Allaffissornermi atortut Kalaallit Nunaanni tunisat sinneqartoorutaasa 10 procentiat peqatigiiffimmut Kalaallit Meerartaannut tunissutaasarput. Buy-Aid-imik suleqateqarnerput tassungaannavik tunngavoq, Tina Frausing erseqqissaavoq.
Taamaattumik peqatigiiffimmi ilisimanngilaat, tunissutissarsiutissanik nerisassarsiutissanillu peqatigiiffiup aqqa taallugu katersisoqarnera.
- Ilisimasaqanngilagut. Uagut katersuiniarneq aallartitarinngilarput. Ilissinninngaanniit KNR-iminngaanniit taama pisoqarnera taamaallaat tusarparput. Soorunami paaserusussaqaarput Buy-Aid-ip Kalaallit Nunaanni suliffeqarfiit allat Foreningen Grønlandske Børn-ip aqqa atorlugu – katersuiniartoqarneraallutik tapersersortissarsiorsimanersut, Tina Frausing nangippoq.
- Maannamut tassa suliffeqarfik ataasiinnavik saaffigineqarsimasoq tusarfigaarput. Imaassinnaavoq suliffeqarfiit allat aamma Buy-Aid-imiit saaffigineqarsimasut, taamaattoqarsimassappallu suliffeqarfiit tusarfigerusunnassapput, Kalaallit Meerartaat-a allattaanerat oqarpoq.
Buy-Aidip pisortaa Knud Mogensen radioavisimut oqarpoq, kukkusumik paasinnittoqarsimasoq.
Buy-Aid Kalaallit Nunaanni suliffeqarfinnut saaffiginnittarpoq allaffimmi atortunik tuniniaalluni.
- Taamatut saaffiginnikkaangatta oqaatigisarparput Kalaallit Meerartaat-nut 10 procentit nakkartartut. Katersuiniartoqarneranik oqarneq ajorpugut – paatsuuineruvoq, Knud Mogensen oqarpoq.
Malitsigitilluguli oqaatigaa Buy-Aid-ip tuniniaasartuata juullimut tunissutissarsiutissanik nerisassarsiutissanillu katersuisoqarneranik oqarnera namminneq aamma kukkunerigitsik.
- Tuniniaasartorput taamaattoqannginneranik erseqqissaavigereerparput, oqarpoq.
Nunatsinni suliffeqarfiit Buy-Aidimit attavigineqarsimassappata Radioavisimi tusarusussavarput.