Peqqinnissaqarfimmi sullissinerit siammassapput
Sinerissamili sulisut aalajangersimasut amigaatigineqarmata suliassat naammassiniarlugit taartaasartut isumalluutigineqartussaapput.
Sinerissami napparsimmaveqarfiit nunaqarfinnilu nakorsiartarfiit, tamaasa massakkut pigineqartut ingerlatiinnarneqassapput, Peqqinissamut qullersaqarfimmi pisortaq Søren Rendal radioaviisimut oqarpoq. Allanngortinneqartussaq tassaavoq napparsimmaveqarfinni allaffitsigut sullissinerit sinerissami nunap immikkoortuinut sisamanut siammarneqarnissaat, kommunersuassanut sisamanut tulluuttunngorlugit, taamaalilluni kommunerujussuarni sisamani innuttaasut sunniuteqarnerusumik sullinneqarnissaat anguneqassaaq, Søren Rendal oqarpoq.
Peqqinnissaqarfiup allaffissornikkut siammarterneqarnerisigut, sulisut sumi tamaani assigiingitsuniittut sunniuteqarnerusumik sulisinnaanissaat siunertarineqarpoq.
Taartaasartunik sulisoqartarnissaq ajornartorsiutaassaaq, taamaattumillu taartaasartut sunniuteqarluartumik sulisorineqassapput. Peqqinissaqarfimmi sulisut taartaasartut pinngitsoorneqarsinnaanngillat, qassiunerili Søren Rendal oqaatigisinnaannginnerarpai.
Peqqinnissaqarfiup allanngortiternissaa Inatsisartut upernaaru 2008-mi ataatsimiinnerminni oqaluuserissavaat. Susassaqartunut KANUKOKA-mullu massakkut tusarniutigineqarpoq.
