Peqqinnarnerusunik imigaqalissasut
Meeqqat oqarpat: Anaana, imerusuppunga! Imaluunniit ataata imerusuppunga! Taava ikiuutaasinnaasumik quppigassaqalerputit.
Pinaveersaartitsinermik isumaginnittoqarfik PAARISA quppersakkamik nutaamik saqqummersitsivoq taaguutilimmik: ”Qitornavit suut imertassavai?” Naqitannguaq taanna angajoqqaanut mikisunik meeralinnut saaffiginnittuuvoq.
Quppersagaq meeqqap peqqinnarnerusumik imigaqalernissaanik ileqqussanik innersuussivoq, taamaalilluni meeqqap alliartornermini iggisissat peqqinnanngitsut soorlu sodavandit saftillu ingalassimasinnaaniassammagit. Meeqqat immunneersunik ullormut liiterip affaanik imertarnissaat aamma sodavanditoratik saftitoratillu imermik imertarnissamik sungiussitinneqarnissaat innersuussutigineqarpoq.
Sodavandit saftillu aatsaat nalliuttorsiualaarnerni sassaalliutigineqartariaqartut, quppersakkami allassimavoq.
- Imerusukkaanni imeq nillertoq imeruernarneruvoq, imaaliallaannarlu pineqarsinnaalluni, quppersakkami ilaatigut taama allassimavoq. Quppersagaq pissarsiarineqarsinnaavoq kommunit allaffiini, paaqqinnittarfinni, atuarfinni, kigutileriffinni il.il. aamma Paarisap nittartagaani www.paarisa.gl-imi.
Quppersagaq Danmarkimi inuussutissalerinermut qullersaqarfik aamma peqqinnissamut qullersaqarfik suleqatigalugit suliarineqarpoq – aamma oqaatigineqartoq imeq nillertoq imeruernarnerusoq aamma inersimasunut atuummat ilanngullugu oqaatigisinnaavarput.