Meeqqat Juullip Inuanit allagarsilerput
Juullip Inuata Nuup allakkerisarfianiit allagarpassuarnik nassiussuivoq, allakkat 150 kiilut nunarsuarmi meerarpassuarnut akissutitut ullumi nassiussorneqarmata.
- Juullip Inuata allagarsiaanut akissutit ulluni makkunani nassiussuleruttorpagut, assersuutigalugu 150 kiilut ullumi nassiuppagut, Nuuk Tourism-imi pisortaq Flemming Nicolaisen oqarpoq.
Sinerissami takornarialeriffiit ukioq manna suleqatigiilluta Juullip Inuanut allakkat akinissaannut aningaasartuutit akilerpagut. Takornarialeriffiit Nuuk Tourism, Destination Disko, Hotel Uummannaq, Kangerlussuaq Tourism-ilu suliassamik kivitseqatigiipput.
Juullip Inuata allakkerisarfiani angut aappalaartumik tujuululik nasalillu issiavoq, tassa Søren Joelsen allakkat nunarpassuarnut juullinnginerani nassiussassat ulapputigigai.
- Allagarpassuit nunanut tamanut nassiussassat frimærkilersorlugit, juullip nipitittagalersorlugit, Juullillu Inuata naqitsisaanik naqitsiffigiortorpakka, Søren Joelsen oqaluttuarpoq.
Takornarialeriffimmi pisortaq Flemming Nicolaisen oqaluttuarpoq allakkat 17.000-it missaaniittut ukioq manna Juullip Inuaniit nassiunneqassasut, aqaguagulu ualikkut pingasunut Juullip Inuata nammineq poorsuaq ulikkaartoq Nuummi allakkerisarfimmut tunniukkumaaraa.