Qaqortumi aappaagumiit efterskoleqalissaaq
Inuusuttut 80-it tikillugit amerlassuseqartut 2008-mi aggustimiit Qaqortumi efterskolersinnaalissapput, Namminersornerullutik Oqartussat aamma Sulisartut Højskoliat isumaqatigiissuteqarnermikkut inuusuttuaqqanut taama periarfissiimmata.
Qaqortumi Sulisartut Højskoliata aamma Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfiup akornanni ukiumi atuarfiusumi 2008/2009-mi højskolimi efterskolimik ingerlatsinissaq pillugu ippassaq isumaqatigiissuteqartoqarpoq.
Ilaatigut atuartut ukioqatigiinngitsut marluiusut 2008-mi ataatsikkut atuarunnaartussat efterskolernissamut periarfissinniarlugit iliuuseqartoqarpoq.
Isumaqatigiissut naapertorlugu inuusuttut 80-it tikillugit 2008-mi aggustimiit 2009-mi juunimut Qaqortumi efterskolersinnaalissapput, fagini nalinginnaasuni atuartinneqassallutik aammali assersuutigalugu Kujataani pinngortitami periarfissat atorluarlugit tigussaanerusutigut ilinniartinneqassallutik.
Qinnuteqarniartut efterskolerniarnermi nalinginnaasut aqqutissat aqqutigalugit qinnuteqarsinnaapput, imaappoq nammineq kommuniminni ilinniagaqarniartunik siunnersuisarfiit saaffiginerisigut.