Siumut IA-lu suleqatigiissasut

IA-p Siumullu kommunalbestyrelsemi ilaasortaatitaasa siulittaasui gruppeformandit, Siumumit Ane Egede Mathæussen aamma IA-mit Ove Karl Berthelsen, Nuup borgmesterertaavanik Nikolaj Heinrichimik ualiartoq nalunaaqutaq marlunut ataatsimeeqateqarnerminni 2005-imi Atassut peqatigalugu suleqatigiinnissamut isumaqatigiissusiamik ingerlatiinnarnissaa isumaqatigiissutigaat.

Inuit Ataqatigiinneersoq Ove Karl Berthelsen ima tunngavilersuivoq.

- Allannguisoqarnissaanik uani annertuumik oqaluuserisaqanngilagut, tassami 2008-mut missingersuutinut tunngasut aaqqereerput, kisiannilu aqutseriaaseq taavalu siunertaqarneq aammalu qanoq siunissami suleqatigiinnissatta ilusilernissaa massakkut decembari atorlugu suliarinissaanik isumaqatigiippugut, Ove Karl Berthelsen nassuiaavoq.

Erseqqissaatigaalu 2005-imi Siumup, IA-p aamma Atassutip peqatigiillutik suleqatigiinnissamik isumaqatigiissutiginikuusaat atorunnaarsinneqarnikuunngimmat.

- Aamma atorunnaarsinngilarput massakkut, kisiannili allanngortitassat assigiinngitsut qanoq ikikkoqarumaarnersut decembarip ingerlanerani aaqqissuunnissaat isumaqatigiissutigaarput.

Ove Karl Berthelsenip erseqqissaatigaa Nuummi innuttaasut kommunalbestyrelsemi eqqissiviilliortoqarnissaanik aarleqqutissaqanngitsut.

- Aamma qamani ataatsimiinnitsinni eqqissilluta juullisiornissarput siunertaralugu sulinissaq isumaqatigiissutigaarput. Akisussaassuseqartumillu tamatta piumassuseqarluta avissaarluta.

IA-p kommunalbestyrelsemi gruppeformandiata ilimageqqunngilaa avissaartuuttoqarnissaa.

Taama aamma Ane Egede Mathæussen, Siumup gruppeformandia oqarpoq.

- Oqaatigisinnaavara iluatsinni suleqatigiittut ingerlasutut aamma taakkua ataqqeqatigiilluta ingerlassimasagut ingerlatiinnassallugit isumaqatigiikkatta.

- Innuttaasut oqariartorfigisinnaavagut, uagut ilutsinni taanna isumaqatigiiinnissamik isumaqatigiissut ajunngimmat immini. Taannalu tunaartaralugu ingerlaniaratta innuttaasut toqqissillutik juullisiornissaassapput, Siumup Nuup Kommunalbestyrelseni ilaasortaatitaasa siulittaasuat Ane Egede Mathæussen oqarpoq.