Nikolaj Heinrich ataatsimiissutigineqassaaq
Nikolaj Heinrichip Nuup Kommuneani borgmesterinngorneranut atatillugu Nuummi Inuit Ataqatigiit taaseqataannginnerat apeqqutillu arlallit, Nuup Kommunalbestyrelsiani Siumup IA-llu ilaasortaatitaasa ualeru nalunaaqutaq marlunut ataatsimiissutigissavaat, Doris Jakobsen, Nuup Kommunalbestyrelseani Siumut sinnerlugu ilaasortaq taama oqarpoq.
Inuit Ataqatigiit sinnerlugit Ove Karl Berthelsen radioavisimut ippassaq oqarpoq, Nikolaj Heinrichip partiimi Siumup iluani aamma immikkut isummersortarsimanera pissutigalugu borgmesterinngorniunnermi arfininngormat taaseqataasimanatik.
Naallu Siumut, Atassut Inuit Ataqatigiillu kommunalbestyrelsemi suleqatigiinnissamik isumaqatigiissuteqareeraluarlutik, siunissami amerlanerussuteqarfigineqarsinnaasuni Inuit Ataqatigiit illuatungiliuttut Demokraatit suleqatigineqartassasut aamma oqaatigaat.
Kommunalbestyrelsemi inissani 17-iusuni Siumut arfineq-marlunnik, Demokraatit tallimanik, Inuit Ataqatigiit sisamanik, aamma Atassut ataatsiminik ilaasortaatitaqarput.
- IA aamma Siumut ataatsimeereerpata tusagassiuutinut nalunaaruteqartoqarumaarpoq, Doris Jakobsen oqarpoq.