Kulturerput Domusimi takutinneqassaaq
Ungdomsskolen Domus Vejlemiittoq Kalaallit kulturiat pillugu decembarip 15-ianni 16-iannilu saqqummersitsiviussaaq. Kalaallit peqatigiiffiat ”Qarsoq” aaqqissuisuuvoq, tassa ukiunik 35-inngortorsiornertik iluatsillugu.
Atisanik mutinik takutitsisoqassaaq, nipilersortoqarluni, kalattoortoqarluni, kalaallit kusanartuliaannik saqqummersitsisoqarluni kiisalu kalaallit nerisassaataannik ooqattaagassaqassalluni.
Peqatigiiffimmi siulittaasup Daniel Skiftep, siornatigut Atassummut siulittaasuusup, piareersaanini upernaarli aallartereersimavaa.
- Kiisami aaqqissuussinermut aningaasat atorneqartussat tapiissutit naammatsipput, maannalu Vejle Kommune qaaqquarput inuillu maani najugaqartut Kalaallit Nunaat pillugu soqutiginnissinnaasut paasisassarsiornissaat periarfissillugu, taama oqarpoq naalakkersuisunut ilaasortaasimasoq maanna soraarnerusoq Daniel Skifte.