Kalaallinut tunngasumik atuakkiortoqaqqippoq
Atuakkat saqqummersinneqartut kingulliit ilaat taaguuteqartoq ”Silarsuaq alla” cand.mag.-itut ilinniarsimasumit Lill Rastad Bjørst-imit atuakkiarineqartoq, Kalaallit Nunaat nunallu issittut pillugit isummat pigiliutiinnakkanut tunngassuteqarpoq.
Allamiut kalaallinut isiginninnerat, minnerunngitsumillu kalaallit allamiunit qanoq isigiumaneqarnerat, atuakkami sammineqarput.
Isummat pigiliutiinnakkat tunuliaqutaat sakkortussusaallu atuakkami eqqarsaatersorfigineqarput. Atuakkap oqallinnermik aallarniinissaa Lill Rastad Bjørst-ip neriuutigaa.
Ukiuni tusintilikkaani tulliuttuni Kalaallit Nunaannik isiginninneq qanoq ittuussanersoq atuakkami apeqquserneqarportaaq.
Atuakkiortoq Nuummi Katuami atuakkiani pillugu unnugu oqalugiassaaq.