Marlunnik ukiulik saqqummersitsisoq
Tassami niviarsiaraq marlunnik ukiulik Ernutannguaq Tellesen Kulturip Illorsuani qalipakkaminik ullumimiit juunip arfineq pingajuata tungaanut saqqummersitsivoq.
Tassa Ernutannguup arnaa, Najaaraq Tellesen sapaatip akunneri marlussuit matuma siornagut Taseralimmut saaffiginnippoq siunnersuutigalugulu panimmi qalipagai meeqqat ulluannut atatillugu saqqummersinneqarsinnaasut. Aaqqissuussinermut pisortap Arnajaraq Støvlbækip qalipakkat takugamigit isumassarsiaq ingerlaannarluni akueraa.
- Annoraaminermut qalipagaapput imminullu tulluartuullutik, takujuminartuullutillu, Arnajaraq Støvlbæk Radioaviisimut oqaluttuarpoq.
Maannalu Ilaqutariinnermut Peqqissutsimullu Naalakkersuisoqarfik Taseralimmi “Ilaqutariit nukittuut” pillugit sapaatip akunnerata tulliani ataatsimeersuartitsisussaammat, peqataasullu meeqqanut tunngasunik sammisaqartussaammata Ernutannguaq Tellesenip saqqummersitsinera tulluarluinnarpoq.
