Umiarsuarsuaq takornariut M/S Fram Paamiunut ataasinngormalli tikereerpoq. Illoqarfinnik allanik aamma tikitaqarnissaa pilersaarutigineqarsimagaluarpoq, sikorsuilli akornutaapput, taama Royal Arctic Line-imit John Kjær ilisimatitsivoq.
M/S Fram-ili ullumi tallimanngornermi Nuummut tikissaaq takornariat 218-it issimasoralugit.
Siorna nunatsinnut takornariat tikittut 23.500-pput ukiup siuliani 22.000-iusimallutik. Aappaagu 25.000-iunissaat ilimagineqalereerpoq.
Takornariat umiarsuarnut ilaallutik tikittussarpassuit ulapaassutigineqalereerput, pingaartumik takornarianik sullissivinni.
Nunatsinni Takornariaqarnermi Inuussutissarsiornermilu Siunnersuisoqatigiit GTE nalunaarput, takornariat umiarsuarsui 30-t sinneqartut illoqarfinnut nunaqarfinnullu 385-eriarlutik ukiormanna tikissapput.
GTE-mi Takornarianik sullissinermi pisortaq Anders la Cour Vahl oqarpoq, M/S Fram-i angallassisalermalli nunatsinnut takornariat amerligaluttuinnartut, nunatta aningaasaqarneranut aamma iluaqutaasumik.