Ammassallip Kommunia sipaarniartussaavoq

Kangia Kitaata kommunissaani ikaarsaariarnermut ataatsimiititaliap akuliunneratigut kommuninik nakkutilliisoqarfiup Ammassallip Kommuneata 8,5 millioni koruuninik sipaarnissaa sulissutigaat. Borgmesteri Vittus Mikaelsen sulinermut atatillugu angalareerluni uternermini sipaarfiusussat ullaaq suleqatini peqatigalugit misissoreerlugit pingasut sipaarfigisariaqanngitsutut taarusuppai.

Isikkamik arsaannermi pissartanngorniunnernut angutitamik peqataanissaat, Immakkut nunakkullu sukkaniunnermi Tasiilami ingerlanneqartartumi Siku Extreme Arctic Challenge-imi aamma meeqqat atuartut qaammatini pingasuni Danmarkiliartittarnerannut aningaasaliissutaareersut peerneqartariaqanngitsutut oqaatigai:

- Tassani misissoqqissaarneranni uanga paasivara ingammik pingasut taakku aaqqiivigineqartariaqartut.

Tassaapput siulleq: Nuna tamakkerlugu isikkamik arsaannermi pissartanngorniunnissamut 300.000 koruuninik immikkoortitat, Vittus Mikaelsen aallartippoq.

Sulisuni maanna piumaffigai timersoqatigiit, illoqarfimmi nunaqarfimmilu arsaattartut peqatigiiffiisa siulittaasui naapeqatigissagaat, pissartanngorniunnerit Qaqortumi aggutsimi pisussat qanoq Ammassallip Kommuneata peqataaffigissagunigit aningaasartuuteqartigissanersut.

- Taassuma saniatigut aamma aasakkut unammersuartarnerit sakkortunersaat ATC (Immakkut nunakkullu sukkaniunneq SEAC-imik maanna naalisarneqartartoq) kommunemit taamaallaat ukiumut 150.000 koruuninik aningaasaliiffiusartoq tapiiffigisariaqarparput, borgmesteri oqarpoq.

Unammersuarnermi aaqqissuisut ernumassutigisaat uaniippoq, amigaartooruteqassagaluarunik qanoq aningaasannanniartoqassanersoq.

- Taanna takorluuinnarluni taama inissiisoqarsinnaanngilaq, taamaattumik aqutsisuat sulisuma ullumikkorpiaq ataatsimeeqatigissagaat piumaffigaakka, Vittus Mikaelsen nangippoq.

Borgmesteri isumaqarpoq 8,5 millioni koruuninik sipaarnissami 150.000 koruunit sunniuteqarnavianngitsut.

- Pingajorivaa meerartatta 7. klasset Danmarkimut illoqarfittut ikinngutigisamut Gentoftemut ukiut tamaasa aggustimit oktobarip naaneranut atuariartortarnerat. Meeqqat Gentoftemiinnerminni siunissaminni atuarnissamut maana uteqqikkaangamit piumassuseqartorujussuanngortarput. Taakku sipaarfiginissaat kissaatiginngilakka, aningaasat 365.000 koruuniinnaapput, oqarpoq.

Allatigut aningaasat nassaarineqartaqariaqarsorai. Sipaaruteqarfiusussatullu kommuninik nakkutitaakkartukkat kommunalbestyrelsep ataasinngorpat juunip ulluisa aappaanni ataatsimiissutigissavai, akuerissallugillu.

- Sipaarfissatut ikkunneqarsimasuugaluit peerneqartariaqanngitsut katillugit ½ millioni koruunit missarpiaanniikkamik, Vittus Mikaelsen nassuiaavoq.

Radioaviisimi naatsorsuinerput malillugu sipaarfiussanngitsuttut siunnersuutai 815.000 koruuninik naleqarput.

Ammassallip kommuniani borgmesterip erseqqissaatigaa sipaarfiusussat sapinngisamik meeqqanik sullissinermik eqquinnginnissaat sulissutigiuarsimagitsik.