Myanmarimi taasisitsisoqarpoq
Myanmarimi maajip aallartilaarnerani anorersuallarmat inuit tuusintilikkaat eqqorneqarput, innuttaasullu eqqorneqarnerpaajusut ullumi taasitinneqassapput.
Skrevet af Mads Lynge
Nunami naalakkersuinikkut aaqqissuussinerup allanngortinneqarnissaa taasissutigineqassaaq, demokratii tunngavigalugu ukiut marluk qaangiuppata qinersisoqartalersinnaanissaa anguniarneqarluni.
Taasissutigineqartussarli sakkutuut kisermaassillutik naalakkersuisut akuersissutigigereermassuk alaatsinaattut isumaqarput taasisitsinissaq isumaqanngilluinnartoq, sakkutuullu sukannernerusumik aqutsilernissaat aarleqqutigineqarluni.
Maajip qulingani taasisitsisoqaqqaarmat innuttaasut 92,4 procentii siunnersuummik tapersiisut sakkutuut nalunaarutigaat, taamanikkullu taasisitsisoqarmat anorersuarmit eqqorneqarsimanngitsut taasitinneqarput.