Maarmorilimmi aatsitassamik piaanissaq pillugu atsioqatigiipput
Maarmoriliup piiaaffittut ammaqqissinnissaa ullumi atsioqatigiinnikkut qulakkeerneqarpoq. Atsioqatigiittuupput Aatsitassanut Naalakkersuisoq Kim Kielsen, aatsitassarsiortussat Black Angel Mining Company aamma Uummannami borgmesteri Jens Lars Fleischer.
Aatsitassarsioqatigiiffiup Black Angel Mining Company-p naatsorsuutigaa Maarmorilimmi sulineq aallartippat 85-inik sulisoqassallutik, taakkulu amerlanersaat tassaassapput nunaqavissut, immikkulli ittumik qaarusummi sulinernut ilisimasallit Sydafrikameersussat 20-t aallaqqaammut sulisinneqartussaajumaarput.
- Sulisut amerlanersaasa kalaaliunissaat qulakkeerniassavarput, Jens Lars Fleischer Maarmorimminngaannit ualiartoq nalunaaqutaq pingasunngulersoq atsioqatigiit malittaasalu Uummannamut uterneranni naammattooratsinni oqarpoq.
- Suliffissanik ataavartunik aamma Uummannap siunissami akileraartarnikkut aatsitassarsiornermit isertitaqaqqilernissaanik taamaalilluta aamma qulakkeerinnittussanngorpugut, Jens Lars Fleischer unnersiorpoq.
Maarmorilimmi siunissami pisussat pillugit innuttaasunik ataatsimiitititsineq Uummannami ualilluinnartoq nalunaaqutaq sisamanut aallartippoq.