Josef Motzfeldt: KNR pillugu oqallinnerusoqartariaqarpoq
-Inatsisartuni oqallinnermi saqqummertoq tassaavoq, sunik-una ajornartorsiuteqartoqartoq, imaluunniit pitsaanngorsaataasinnaasunik eqqarsartoqartoq. Taamaammat-una oqallinnissaq sioqqulluangaarlugu, ilaatigut naqitatigut oqallissaarummik saqqummiisunga, Josef Motzfeldt oqarpoq, nangillunilu.
- Taamanikkulli naatsorsuutigilluinnarpara KNR-imi siulersuisut nutaat, nutaajunertik iluatsillugu periarfissaq atorluarsimassagaluaraat, aningaasaliisartumik oqallinnissaat sioqqullugu paasissutissanik assigiinngitsunik – aggersarlugit imaluunniit allaffigalugit imaluunniit atuagassiakkut akissuteqarlutik. Kisianni taanna, tusaasinnaaasakka najoqqutaralugit anersaaruluutigineqartoq, uanga kisima anersaaruluutiginngisara, tassalu KNR-imi pisortat kiisalu KNR-imi siulersuisut oqaatsimik ataasinnguamilluunniit oqallinissaq sioqqullugu issannerpallanninnguamilluunniit annitaqarsimanngimmata, oqarpoq.
Apeqqutaalluinnarnerarpaa ippassaq oqallinneq aallaavigalugu inatsisartunut ilaasortat ataasiakkaat imaluunniit partiit ilaat ataatsimmiinnissami tullermi imaluunniit tulliata tullianut oqaluuserisassanngortitserusussanersut KNR-i pillugu qanoq aalajangiisoqarnissaanik siunnerfeqartumik. Kisianni taamaalioruminaatsorujussuuvoq pineqartumi oqartussaasut oqaloqataanissamut piumassuseqanngitsutut inissisimanertik qimanngippassuk.
Ippassaq KNR-ip Namminersorlutik Oqartussaniit pituussaarluni ingerlalernissaa siunnersuutigaat. Ilimagaajuk aallakaatitassiat pitsaanerulernissaat taamaalissappat Apereqqipparput.
- Nalulluinnaqqissaarpara. Kisianni ullumikkorninngaanniit nammineernera annertusillugu imminut pigisunngorluni ingerlalisappat, ilumut taanna kissaatiginarnersoq KNR-ip ingerlatsisuisa siulersuisuisalu uagutsinninngaanniit ilisimaneruaat. Tamakkuninnga tusarlersimasariaqaraluarpaatigut, oqallinnissaq sioqqullugu, sammiveqarnerusumik oqallinneq ingerlanneqarniassammat.
Josef Motzfeldtip inatsisartuni ippassaq ilaatigut oqaatigaa, inuiattut nappaatitut atugarput mamiatsajanersuaq qimanniassagutsigu, aallakaatitassiat ilaarutiginninernik imaqartut iluaqutigalugit mamiatsajanersuatsinnut akiuussutissatut atorsinnaagaluarivut.
