Hilary Clinton tunniutiinnarusunngilaq
Amerikami politikkikkut ingerlatsinermik immikkut ilisimasalik, Niels Bjerre Poulsen apersorneqarami oqarpoq, aggustimi demokratit ataatsimeersuartinnagit arlaatigut Obamamut sanngiillisaataasinnaasunik takkuttoqariataarnissaa Clintonip utaqqimaaraa, imaluunniit demokratit qinersisartutoqaasa nuannarinngisaannik Obamap tunngavilersueriataarsinnaanera qamarujooraa. Allaassagaluarpormi Hillary Clinton USA-mi naalagaaffiit ilaannaanniluunniit ajugaarujussuarnikuugaluarpat, imaluunniit soorlu oqartoqarsinnaasuuppat qaqortumik amillit akornanni malunnaatilimmik qinerneqarnerusimasoq, taamaattoqanngilarli.
Niels Bjerre Poulsen aperineqarami Clintonip malartaasernermigut præsidentimut qinersisoqalivippat partiimi ajugaasinnaanissaa, namminerlu siunissami politikeritut ingerlaqqissinnaanissani akornusersuinnarsinnaannginneraa, Bjerre Poulsen oqarpoq, qineqqusaarnermi sakkortuumik oqaasipiluuttoqaranilu nikanarsaaniarluni qineqqusaartoqanngimmat imaassinnaasoq demokratit partiiannut iluaqutaaginnartoq, parteertimmi saqqumilaarsippaat, soorlulu Indianami qinersisartut aamma soqutiginninnerulersissimallugit.