Illusisimanermut tunngasoq politiit suli utaqqimaarpaat

- Suliaq politiit maannakkorpiaq alaatsinaappaat. Suliaq politikkikkut aamma eqqartuussissuserisunik misissuisitsinikkut maanna ingerlanneqarpoq. Taamaammat politiit akuliunnissaat piaarpallaartutut isigaarput, Morten Nielsen oqarpoq.

Nuna Eqqartuussissuserisut nalunaarusioreerput, tassanilu nalorninaatsumik oqaatigineqarpoq inatsisinik unioqqutitsisoqarsimasoq. Paasissutissat taakku suliamik aallartitsinissassinnut naammannginnnamik? Aperaarput.

- Suli oqaatigisinnaanngilarput, paasissutissat nalilersorneqaqqaartussaammata. Suliamiit suliamut nalilersorneqartarput, nassuiaavoq.

Politimestereqarfimmit aamma tusagassiuutini allaatigisat malittarineqarput, taakkunanngalu paasivaat naalakkersuisut naalagaaffiup eqqartuussissuserisuanut kammeradvokatimut maanna suliakkiisimasut.

- Soorunami misissuisitsinerup inernissaa suliamik aallartitsinissatsinnut tunngavissaanersoq utaqqissavaput.

Politimesterip tullersortaa aamma aperaarput kinaluunniit illunik pisisarsimanernut atatillugu politiinut unnerluutiginnissinnaanersoq.

- Aap, kinaluunniit politiinut suliassanngortitsisinnaavoq, taamaattoqarpallu nalunaarusiaq paasissutissallu allat pissarsiarineqartut tunngavigalugit eqqartuussivitsigut suliarinissaa tunngavissaqarnersoq misissussavarput. Tassani inuup saaffiginnittup saaffiginnissuteqarnerminut tunngavii sorpiaanersut paaseqqaartariaqassavagut, Morten Nielsen oqarpoq.

Nuna Eqqartuussissuserisut nalunaarusiaat tunngavigalugu innuttaasoq suliassanngortitsiniarluni politiinut saaffiginnikkaluarpat, qanoq taava politiit iliussanersut aamma apeqqutigaarput, imalu akivoq.

- Apeqqut qanoq akissallugu nalunarallarpoq, suliassartaa sunarpiaanersoq apeqqutaassammat, suli naliliiffigisinnaanngikkallarpara, Morten Nielsen naggasiivoq.