Suliaq imaannaanngitsoq naammassineqarpoq
Tamanna ilaasortat, tassalu Lars-Emil Johansenip Siumumeersup Kuupik Kleistillu IA-meersup isumaqatigiissutigaat. Folketingimi tusagassiortunik katersortitsinermi Kirstine Berthelsenip Lars-Emil Jonansen siullermik aperaa maannakkut naammassinerminni sulinertik qanoq nalilersinnaaneraa.
- Tassa suna tamangajalluinnarmi artornarsimaqaaq, pissutigalugu namminersornerulernissarput pillugu isumaqatigiinniaratta sorpassuit ilangunnikuugatsigit, taava alloriaqqinissaq tulleq ajornarnerpaarpaasimavoq, aama iluatsinnikuunngilarput tamakkisumik , tassa nunanut allanut oqartussaanerup annertuserujussuarnissaa nunatsinni. Tassa Danmarkip grundlovia aporfiunerpaasimavoq. Kisianni aamma ajornartorsiutaajuaannarsimasoq; nunami pisuusutitsinnut piginnittussaaneq, maannakkut anguarput, imaluunniit siunnersuuterput malttaralugu akuerineqassappat, Kalaallit Nunaannik kalaallit piginnittuunerat inatsimmi allassimalissammat. Kalaallit inatsisartuininngaanniit saqqummiussorneqartut tamarmik anguneqarput, grundlovimik killilerneqartut kisimik pinatik. Tassa una inatsit akuerineqaruni taanna atorlugu kalaallit namminersulernissartik piareersarsinaanngorpaat. Takanna – Danmarkillu suleqatiginissaa isummarfigalugu.
Kuupik Kleist, qanoq naliliisinnaavit suleqatigiissimanissinnut?
Isumaqarpunga isumalioqatigiissitami kalaallit ilaasortat tamatigut isumaqatigiinniaqqaartaratta, aammalu isumaqatigiissutigisaratsigu apeqqutinut suliarisassatsinnut tunngasunut ataatsimuussalluta, aammalu isummiussagut illersussalugit illersoqatigiillutalu. Taamaalilluta isumaqatigiinniarnerni aporaaffiusuni nukittulluta isumaqatigiinniarsinnaasimavugut, angusassagut aamma angusinnaasimallutigit. Una alloriarneq namminersornerulernerminngaanniit namminersulernissamut alloriarneruvoq pingaarutilik, aamma inatsisissatut siunnersuutigisassarput periarfissarpassuarnik ammaassisussaavoq. Tamatuma saniatigut oqaatigineqartariaqartoq unaavoq; inuiaat nunatsinni innuttaasut isuaat aalajangiisuulluinnartussaammat qanoq pisoqarnissaanut.
Kuupik Kleist Lars-Emil Johansenilu isumaqatigiillutik oqaatigaat naalagaaffinnik allanik qanimut suleqateqalernissaq siunissami avaqqunneqarsinnaassanngitsoq.
