Zimbabwemi suliumajunnaaqqusineq malinneqarpallaarsimanngilaq
Illoqarfiit pingaarnersaanni, Hararemi suliumajunnaarnerit malunnaateqarpianngitsut oqaatigineqarpoq. Illoqarfiulli avatinnguani politiit illuatungiliuttullu aporaattarsimapput.
Taamatut aamma siorna tamanik suliumajunnaartoqaqqusineq malinneqanngilaq, maannami aamma inuit 20 procentiinnaat suliffeqarput, sinnerilu inuuniapiloreeqalutik.
Zimbabwemi eqqartuussisuunerit marsip ulluisa 29-anni qinersinerup inernera nalunaarutigeqqullugu naalakkersuisunut pinngitsaaliissutiginiarnagu ippassaq nalunaarput, taasinerilli kisinneqaqqinnissaat siunnersuutigalugu. Illuatungiliuttulli kisitseqqittoqassagaluarpat peqquserluttoqarniarnissaa aarlerigaat. Naalagaafiit Zimbabwep sanianiittut akuliukkusunnatik ippassaq nalunaarput.
Naalagaafiit Peqatigiit isumannaallisaanermut isumalioqatigiissitaat aqagu Zimbabwemi pissutsit pillugit ataatsimiittussaagaluarput, Mugabeli naalakkersuisuutillugu qanoq iliuuseqarsinnaanerit killeqarput, Mugabemmi naalagaaffiit killiit qanoq isumaqarnerat soqutiginngivippaa, Danmarkip aallartitaqarfiani pisortaq Tommy Schierbeck oqarpoq.
