Meeqqat atuarfiini freertitsisarnerpassuupput
Pinngitsoorani atuartitsisussaatitaanermut malittarisassaq Upernavimmi, Tasiilami Qaanaamilu eqqortinneqarneq ajortarsimasut, atuarfiit pisortarisaat Radioavisimut nalunaarput.
Upernavimmi atuarfiup pisortaata tulliata Tekle Ghebrelulip oqaatigaa ilinniartitsisut ilinniarsimasut 17-it amigaatigineqartut. Malitsigisaanik ilinniartitsisooreersut katillugit ukiumut qaangiuttoornerit tiimit 600-t ulikkaaruserniartariaqarsimagaat. Ajornartorsiut annertungaarmat pingaarnersiuilluni atuartut minnerit salliutillugit atuartittariaqartarsimanerarpaat, angajulliillu ilinniartitsisussaqanngivinnerarlugit.
Kommunenut 18-iusunut paasiniaareernerup ersersippaa ajornartorsiut imaannaanngitsuusoq.
Ilinniartitsisut peqannginnerini skemat naleqqussarnissaat ajornartorsiutaasaqaaq, freertitsinissarlu periarfissaavoq kingullerpaaq. Timelærerinik atuartitsisoqartarput, angajulliilluunniit immikkut atuartitaanissaannik neqeroorfigineqartarlutik. Malunnarportaarlu nunaqarfimmiut ilinniartitsisussaaleqinermik eqqugaanerpaasut. Nunaqarfiimmi ilaanni allaat ilinniarsimasunik ilinniartitsisoqarneq ajorpoq.
Illoqarfiilli ilaanni, soorlu Aasianni Qeqertarsuamilu ilinniarsimasunik amigaateqartoqanngingajappoq, pisariaqartinneqaraangammi ilinniarnertuunngorniak paarlatseqartarsimagamik.
Atuarfiit pisortaasa erseqqissarpaat ilinniartitsisussaqarniarnermi akissaatit kisimik apeqquserneqarneq ajortut, sumiiffinnili angallannermi aqqutaasinnaasut aporfiusinnaasartut. Ujartorneqarportaaq ilinniartitsisunik amigaateqarnerup iluarsiiviginissaa oqartussaasunit sulissutigineqartariaqalersoq.