Kunngikkormiumik ullumi tikeraartoqarpugut
Kunngikkormiut Kalaallit Nunaannut Aningaasaateqarfiani siulersuisut ataatsimiilernerat Prins Joachimip tikeraarneranut pissutaavoq.
Aningaasaateqarfiup siulersuisui ukioq allortarlugu Kalaallit Nunaanni ataatsimiittarput, ukiorlu manna Ilulissat ataatsimiiffissatut toqqarneqarpoq, Ilulissat kommunaldirektøria Henrik Rafn oqarpoq.
Aningaasaateqarfiup siulersuisuisa ullumi ulloq ataatsimiiffigissavaat aqagulu Jørgen Brønlundip atuarfiata allineqarnera Prins Joachimip pulaassavaa. Sisamanngorpat katsorsaavik Qaqiffik pulaarneqassaaq. Prins Joachimip qimussiunnissaa kiisalu sermersuarmut qulimiguulimmik takornariartinnissaa aamma inissaqartinneqarumaartoq neriuutigineqarpoq.
Naalakkersuisut siulittaasuata Hans Enoksenip, Det Kgl. Grønlandsfondip siulersuisuini ilaasortaasup, Prins Joachim Kangerlussuarmit Ilulissanut ingiallussavaa.
