Air Greenlandip bilitsit aappaluttut akii qaffanniarpai
Tassami apriilip aappaaniit Air Greenlandip aqqummi tassani bilitsit aappaluttut siumut utimullu akii 1.500 koruuninik qaffanniarpai.
Aqqutip taassuma timmisartuutileqatigiiffimmut amigartoorutaanera qaffaanissamut patsisaatinneqarpoq.
Taamatut akinik qaffaanissaq nunap immikkoortuanut kingunerlorujussuartussaasoq, Kujataata kommunissaanut Siumup qinigassanngortitai allapput.
- Qaffaaneq tamaani namminersortunut inuussutissarsiortunullu sakkortoorujussuarmik akornusiissasoq, tusagassiuutinut nalunaarumminni allapput.
Qinigassanngortittut Naalakkersuisut kajumissaarpaat akitsuiniarnermut itigartitseqqullugit.
- Kommune kujalleq ineriartorfiussappat akitsuinerup isiginngitsuusaarneqarnissaa akuerisinnaanngilarput, Siumup Kujataani qinigassanngortitai allapput.