Savanik paarsinerlunnerup kinguneranik savaateqarfiit matuneqarput
Savaateqarfik ataaseq matuneqareersimavoq allali aamma matuneqassalluni, Nunalerinermi Siunnersuisoqarfik taama ilisimatitsisoq, aviisimi Sermitsiami allaaserineqarpoq.
Nakkutilliisut Aqqalooraq Frederiksen aamma Hans Hansen, Siunnersuisoqarfimmeersut, marlunngormat savaateqarfimmut Kingittumut Qaqortup eqqaaniittumut, siornatigut ajornartorsiorfioreersimasumut, misissuiartorsimapput. Piginnittoq siornatigut paarsinerluttutut politiinut nalunaarutigineqareersimavoq, Siunnersuisoqarfimmeersoq Kenneth Høegh taama issuarneqarpoq.
Siunnersuisoqarfiup savaateqarfik alla, Iterlak Igalikup eqqaaniittoq matuneqarsimanerarpaa. Piginnittup savaatimi saniliminnit tiguneqarnissaat akueraa, taakkulu ulluni aggersuni katersorneqassapput.