Nunaoilip 2007-imi naatsorsuutai saqqummiunneqarput
Naatsorsuutit inerneri ilimagisamit pitsaanerupput, tamatumunngalu pissutaavoq uuliasioqatigiiffinnut arlalinnut sajuppillatsitsisarluni misissuinermi paasissutissanik amerlasuumik tunisaqarsimaneq, ingerlatseqatigiiffik allappoq.
NUNAOIL-ip amigartooruteqarnera tupaallannanngilaq. Tassami uuliamik gassimilluunniit niuernikkut iluanaarutigineqarsinnaasumik nassaartoqarnissaata tungaanut NUNAOIL A/S-ip, ingerlatsivittut ajunaaruteqarluni ingerlagallarnissaa ilimagineqarmat.
Uuliasioqatigiiffiit Kalaallit Nunaanni uuliamik gassimillu ujaasinissamut soqutiginninnerat 2007-imi annerulerpoq. Soqutiginninnerup annerulernera NUNAOIL A/S-ip uuliasioqatigiiffinnik arfinilinnik suleqateqalerneranik maannamut kinguneqarpoq, tassa ikummatissanik 2007-imi 2008-llu aallartinnerani ujarlernissamut akuersissutit nutaat arfineq-pingasut tunniunneqarput. Ujarlernissamut akuersissut ataaseq 2008-mi upernaaru tunniunneqarnissaa ilimagineqarpoq.
Nunatsinni uuliamik ujaasineq piffissaq ungasinnerusoq isigalugu ingerlanneqartariaqarpoq. Kalaallit Nunaanni uuliaqarfiusinnaasut annikitsuinnarmik ujarlerfiunikuupput, uuliasioqatigiiffissuilli soqutiginninnerat tunngavigalugu Nunatsinni uuliaqarfinnik annertuunik nassaarsinnaaneq maannakkut ilimagineqarsinnaasoq, NUNAOIL neriulluarluni allappoq.