Issittumi nunat pinngortitamik paarsilluannginnerupput
Pinngortitaq pillugu nunarsuaq tamakkerlugu suliniaqatigiiffiup, WWF-ip, paasiniaaqqissaartarfiullu Allianzip, misissuisitsinerani kingullermi tamanna takuneqarsinnaavoq. Nunanik pisuunerpaanik taaneqartartut arfineq-pingasut, silap pissusaata allanngoriartornera pillugu qanoq suliniuteqarnerinik misissuinissaminut, siunnersorteqarfik kikkunnullunniit attaveqanngitsoq, Ecofys, suliakkerneqarsimavoq.
Gassit silaannarmik kissakkiartortitsisartut killilersimaarnissaannut USA, Canada Ruslandilu iliuuseqannginnerpaasut misissuinerup ersersippaa.
Gassinik silaannarmik kissakkiartortitsisartunik USA aniatitsinerpaavoq, aniatitsinerlugooq suli annertusiartorpoq – Canadamissaaq aamma taamaalluni.
Ruslandip mingutsitsinera USA-mi Canadamilu mingutsitsinermit ajunnginnerulaarpoq. Gassinilli silaannarmik kissakkiartortitsisartunik Ruslandimi aniatitsineq annertoorujussuuvoq, naturgassimilli atuinerulerniarsarivoq.
Silap pissusaa pillugu siunissamut ungasinnerusumut pilersaarusiornissaq issittumi nunat taakku pingasut amigaatigaat.
Mingutsitsinerpaavoq Tuluit Nunaat, tulliulluni Frankrig pingajuuvorlu Tyskland.