NuSuKa: Ilinniarsimanngitsut atorluarneqarsinnaapput
Sanaartornerup iluani sulisut ilinniarsimasut 8-900-t missaat amigaatigineqarput. Ilaatigut taakku assersuutigalugit Nunaqavissut Suliffiutillit Kattuffiata siulittaasuata Gerth B. Lyngep oqariartuutigaa ilinniartitaaneq pingaarnerutinneqartariaqartoq. Taamaaliornikkummi akileraarutitigut isertitat amerlisinnaammata.
Skrevet af Mads Lynge
- Tamakkua tikissagutsigit sukkanerusumik ingerlattariaqarpagut. Taamaammat nilliaatigiuarnikuuarput ilinniartitaanerup piaarnerpaamik pitsanngorsaavigineqartariaqartoq. Aatsitassarsiorneq uuliasiornerlu Kalaallit Nunaannut pingaaruteqartorujussuanngorsinnaavoq, Gerth B. Lynge oqarpoq, nangipporlu:
- Ilinniarsimanngitsut piginnaaneqarfiisa qaffassarneqarnissaat ujartorparput. Piginnaanilippassuupput, allagartaqanngiinnarlutik. Inuiaqatigiinnut ilinniartitsisalersinnaanissaannut qanoq periarfissaqarsinnaanersut aamma qulakkeerneqarsinnaasariaqarpoq, Nunaqavissut Suliffiutillit Kattuffianni NuSuKa-mi siulittaasoq Gerth B. Lynge oqarpoq.