Finn K: Arfernik pisassiisarneq NAMMCO-p akisussaaffigissavaa
Arfernik angisuunik pisassiisarneq NAMMCO-p tigusinnaaneraa Kalaallit Nunaata siunnersuutiginiarpaa. Kalaallit Nunaat Arfanniarneq pillugu ataatsimiititaliarsuarmi taamaaliornikkut ilaasortaajunnaarsinnaassaaq, Aalisarnermut piniarnermullu naalakkersuisoq Finn Karlsen oqarpoq, nangillunilu:
- Puisit arferillu amerliartuinnarnerat eqqarsaatigalugu nerisareqatigiinneq isummersorfigisussaavarput. Puisit Kalaallit Nunaata sineriaaniittut 7 millionit missanniipput, assersuutigigutsigulu aalisakkat ullormut 7 kiilut puisip ataatsip nerisassagai, taava takusinnaalissavarput qanoq tamanna kinguneqarsinnaanersoq, Finn Karlsen oqarpoq.
Puisit amiisa Canadameersut EU-mut eqquteqqusaajunnaarnissaat piviusunngussappat tamanna Kalaallit Nunaannut kingunerisinnaasai aamma eqqarsaatigisariaqarparput, aalisarnermut piniarnermullu naalakkersuisoq oqarpoq.
NAMMCO upernaakkut ataatsimiittaraluarpoq, naalakkersuisulli ukioq manna suliassaqaalummata ataatsimiinneq septembarimut nuunneqarpoq.