Timmisartuaraq Frankrigiminngaanneersunik marlunnik inuttaqartoq, Tunumiit Kangerlussuup tungaanut ingerlaassalluni Kulusummiit aallarsimatsiaannarluni ussikkassuarmik putsiliussaavoq. Timmisartortartup sumiissutsi paatsiveerullugu sermersuarmi qaqqat 2 kilometerisut portussusillit ilaannut siorna juulip ulluisa 20-anni nakkarpoq.
Ajunaalernermut kalerrisaarut sakkutuut umiarsuaannit ”Hvidbjørnimit” tusarneqarpoq, qulimiguulillu annaassiniut, sisamanik inuttaqartoq, ingerlaannartumik aallartinneqarluni. Pujorneralu navianartorsiortitsisimavoq, ilaatigut aquttup sumiiffeerunneranik nassataqarluni.
Qulimiguulik annaassiniarnerup nalaani marloriarluni umiarsuarmut utiinnartariaqarsimavoq. Qulimiguulik pingajussaanik misiliinermi Sermersuarmut missinnaasimavoq, Frankrigiminnaanneersullu marluk annaassinnaasimallugit.
Sakkutuut sisamat saqqarmiulerneqarnerat Holmenimi ullumi pivoq.