Napparsimasut nukersorniartartut Danmarkimut nassiunneqartarput
Københavnimi Rigshospitali aammalu Risskovimi napparsimavik isumaqatiginerisigut napparsimasut persuttaaniartartut Danmarkimut aallartinneqartarnerat piviusunngorsinnaasimasoq, peqqinnissaqarfimmi allaffissornikkut pisortaq, Søren Rendal oqarpoq.
- Napparsimasut persuttaaniartarnerat eqqarsaatigalugu uagut maani piareersimaffiginngilarput, maanimi matoqqasumik immikoortortaqanngilagut. Nukersorniartunut akiuutissatsinnik maani piareersimasuuteqanngilagut sulisoqarnatalu nukersorniartunik immikkut paaqqinnissinnaasunik, Søren Rendal oqarpoq.
- Taamaammat napparsimasut katsorsarneqartussat uloriarnartorsiortitsisartulli Danmarkimut katsorsartikkiartortariaqartarput. Risskovimi napparsimavimmik immikkut isumaqatigiissuteqarnitsigut Rigshospitalimillu suleqateqarnitsigut maani katsorsarsinnaanngisavut aallartissinnaasarpavut, Søren Rendal oqarpoq.