Siulittaasumut qinigassanngortittup Atassut nukittorsarniarpaa
Søren Alaufesenip qinigassanngortinnermini meeqqat inuusuttuaqqallu tamarmik tapisiaqartalernissaat, ilinniagaqarnissamik periarfissiuussinerunissaq, inunnik isumaginninnerup nutarternissaa, inuussutissarsiutinik inerisaanerunissaq kiisalu pisuussutit uumaatsut piiarnissaannut akuersissutit mianersuunneqarnerusariaqartut qineqqusaarutiginiarpai.
Søren Alaufesen Kommuneqarfiiit Kattuffianni KANUKOKA-mi siulittaasuusoq ima nassuiaavoq:
- Atassut oqallinnerni akuunerusariaqarpoq. Partii siornatigut oqallinernut peqataalluartuuvoq, kisianni ukiut kingulliit malunnarpoq oqalliseqataasarnera akulikilliartunngitsoq, Søren Alaufesen oqarpoq.
Atassutip siulittaasuanit Finn Karlsenimit pitsaanerusumik sulisinnaanerarpoq.
- Isumaqarpunga Atassut ersarinnerusariaqartoq.
Søren Alaufesenip Atassutip Siumumik naalakkersuisuni suleqateqarnera ajunngilluinnartutut isigaa, taamaattumillu siunissami, soorlu namminersornermut ikaarsaariarnissamut tunngatillugu isumalluarluni.
- Isumaga malillugu ullumikkumut naalakkersuisuutitaqarneq Siumumillu suleqateqarneq ajunngitsumik ingerlavoq. Ullumikkut suliniutigineqartut soorunami ingerlaffissamissut ingerlasorivakka, aamma inuiaqatigiit qangaaniilli kissaataat Namminersornerullutik Oqartussaanerminngaanniit Namminersornermut ikaarsaariaqartoqarnissaa avaqqunneqarsinnaanngilaq.
Atassutip nuna tamakkerlugu ilaasortaminik ataatsimeersuartitsinera aggustip 28-aniit 30-ata tungaanut Nuup Katersortarfiani ingerlanneqassaaq.