NAMMCO Sisimiuni ataatsimiissaaq
Atlantikup Avannaani miluumasut imarmiut pillugit Ataatsimiititaliaq, NAMMCO, Sisimiuni septembarip ulluisa aappaanniit sisamaata tungaanut arfineq-aappassaa ataatsimeersuassaaq.
Skrevet af Louise M. Kleemann
Arferit, puisit aarillu pisassiissutigineqartarnerisa annertussusissaanik NAMMCO-p ilisimatuussutsikkut ataatsimiititaliaata siunnersuutaat, Savalimmiuniit, Islandimiit, Norgemiit Kalaallit Nunaanniillu aallartitat ilaatigut oqallisigissavaat.
Oqaluuserisassanut aamma ilaavoq, arferit puisillu nunarsuaq tamakkerlugu alapernaarsorneqartarnissaat, NAMMCO-p atulersikkusutaa. Aallartitat aamma oqaluuserissavaat arfernik puisinillu piniariaatsit.
Canadami, Japanimi, Ruslandimi Danmarkimilu naalakkersuisut alapernaarsuititaat ataatsimeersuaqataajartussapput, ataatsimeersuarneq Sisimiuni kulturip illuani, Taseralimmi, pissaaq.