Kangerlussuup ungasinngigisaani aappaagu aasivittoqassaaq

Kalaallit Nunaanni Utoqqaat Kattuffiat aamma Amerikap Nunavittaani eqqillit utoqqartaasa kattuffiat aasivittoqarnissaanik aaqqissuisuussapput.

Eqqillit Amerika Kujallermeersut, Amerika Qiterlermeersut aamma Amerika Avannarlermeersut katersuunnissaat siunertaavoq, soorluttaaq naggueqatigiit Inuit Canadameersut, Alaskameersut Siberiaminngaanneersullu katersuunniarneqartut. Saamit Skandinaviap avannarpasissuaneersut aamma peqataassapput.

Silap pissuaata allanngoriartornera ilutigalugu nunap inoqqaavisa atugaat eqqartorneqartussanut ilaapput.

Nunap inoqqaavisa saniatigut inuit nuimasut arlallit aasivittoqarnissaanut peqataassasut nalunaarutigineqarpoq. Ruslandip præsidenterisimasaa Mikhail Gorbatjov filmiliaritittartorlu George Clooney peqataassapput. Inuit katillugit 500-t missaat peqataassangatinneqarput.

Kangerlussuup nittarsaanneqangaatsiarnissaa ilimagineqarsinnaammat aasivittoqarnissaa Sisimiut kommunianit 160.000 koruuninik aningaasaliiffiginiarneqarpoq.